Segir mikilvægt að strandveiðar hefjist á tilsettum tíma

Jón Bjarnason, sjávarútvegs og landbúnaðarráðherra, segir mikilvægt fyrir atvinnulífið á landsbyggðinni að strandveiðar hefjist á tilsettum tíma. Samkvæmt frumvarpi ráðherra eiga strandveiðar að hefjast um næstu mánaðamót en Alþingi á enn eftir að ljúka annarri umræðu um málið.

Strandveiðar voru leyfðar með bráðabirgðalögum í fyrra sumar en nú stendur til að lögfesta veiðarnar. Samkvæmt frumvarpi sem nú liggur fyrir alþingi er gert ráð fyrir því að 6 þúsund tonnum af óslægðum botnfiski verið sérstaklega ráðstafað til veiðanna. Gert er ráð fyrir því að veiðarnar geti hafist um næstu mánaðamót en Alþingi á hins vegar enn eftir að ljúka annarri umræðu um málið.

Jón Bjarnason, sjávarútvegs- og landbúnaðarráðherra, vonast til þess að alþingi nái að ljúka málinu í næstu viku. „Ég veit ekki annað en að það sé góð sátt í þinginu um málið. Ég legg áherslu og hvet Alþingi til að afgreiða málið sem allra allra fyrst þannig að það geti komið til framkvæmda fyrsta maí eins og frumvarpið gerir ráð fyrir," segir Jón Bjarnason.

Jón segir að skipti miklu máli að strandveiðarnar komist í gang. „Það er beðið eftir þeim það er kallað á meiri aflaheimildir sem alltaf alveg frá því í fyrra sumar var gert ráð fyrir að kæmi með strandveiðunum. það eru margar byggðir sem treysta á að strandveiðarnar komi sem viðbót inni í atvinnulífið á þeim svæðum," segir Jón.