Hrósa Martin fyrir hreinskilni

Bandarísku samtökin GLAAD sem berjast gegn fordómum gegn samkynhneigðum hafa hrósað popparanum Ricky Martin fyrir að hafa komið út úr skápnum.

Martin, sem er frá Púerto Ríkó, batt enda á sögusagnir um samkynhneigð sína á heimasíðu sinni á mánudag þar sem hann viðurkenndi að hann væri hommi. „Þegar einhver eins og Ricky Martin kemur út úr skápnum er það mikilvægt því hundruð milljónir manna tengjast honum menningarlegum böndum. Það sem líka er hvað mikilvægast er að hann er faðir sem vill svo til að er samkynhneigður,“ sagði forseti samtakanna, Jerrett Barrios. „Svona hreinskilni hvetur til meira umburðarlyndis gagnvart samkynhneigðum í Bandaríkjunum, í Suður-Ameríku og úti um allan heim.“

Martin hafði þetta að segja í yfirlýsingu sinni: „Ég segi það með stolti að ég er hamingjusamur samkynhneigður maður. Ég er mjög sáttur við það hver ég er.“

Popparinn hefur selt yfir sextíu milljónir hljómplatna um heim allan á undanförnum árum. Á meðal vinsælustu laga hans eru Livin"La Vida Loca, María og She Bangs.