Vilja Smith sem Hróa

Svo gæti farið að Will Smith leiki Hróa hött í nýrri mynd Wachowski-bræðranna um þennan sokkabuxnaklædda Skírisskógsbúa. Systkinin munu að öllum líkindum leikstýra myndinni Hood hjá Warner Bros samsteypunni og vilja þau að Smith leiki aðalhlutverkið. Ef Smith þekkist boðið fetar hann í fótspor ekki ómerkari manna en Erroll Flynn, Sean Connery, Kevin Costner og Russell Crowe, sem lék Hróa síðasta sumar. Smith hafnaði á sínum tíma aðalhlutverkinu í The Matrix, sem Wachowski-bræðurnir leikstýrðu. Keanu Reeves fékk þá hlutverk Neo og stóð sig eins og sönn hetja.