Rooney Mara byrjuð að æfa

Rooney Mara, hin óþekkta leikkona sem hreppti hlutverk Lisbeth Salander í amerísku útgáfunni af Millenium-þríleik Stiegs Larsson, er byrjuð að æfa sig á mótorhjóli.

Fyrstu myndir af Mara í hlutverki tölvuhakkarans hafa að undanförnu birst á netinu og þar sést greinilega að það verður lítið gert út á snoppufrítt andlit Mara því hárgreiðslan er æði sérstök og hún hefur þurft að bæði styrkja sig og grenna fyrir hlutverkið. Þá hafa paparazzi-ljósmyndarar náð myndum af Mara á mótorhjóli en eins og aðdáendur bókanna ættu að vita þá kallar Salander ekki allt ömmu sína og keyrir oftast um á mótorfák.

Óhætt er að fullyrða að mikil eftirvænting ríkir eftir því hvernig leikstjóranum David Fincher tekst upp við að fanga andrúmsloft þessara mögnuðu bóka Larsson. Sá orðrómur hefur verið á kreiki að allir leikarar myndarinnar eigi að tala ensku með sænskum hreim en það hefur ekki verið staðfest. Daniel Craig mun leika Mikael Blomkvist, Robin Wright verður ritstjórinn Erika Berger og Stellan Skarsgaard mun leika hrottann Martin Vanger en fyrsta myndin fjallar einmitt um skelfileg leyndarmál Vanger-fjölskyldunnar.