Langaði að vera töff í ræktinni

Hönnuðurinn Stella McCartney, 39 ára, byrjaði að hanna leikfimifatnað af því að hún vildi vera töff í ræktinni og líða vel á meðan hún væri að æfa.

Stella hannaði fyrst íþróttafatnað fyrir vörumerkið Adidas árið 2004 sem sló í gegn á heimsvísu og eitt leiddi af öðru í framhaldinu.

Stella segir mikilvægt að konum líði vel í ræktinni eins og annars staðar.

„Ég vil ekki skammast mín fyrir útlitið þegar ég er að æfa. Það hefur miklu meira verið gert af því að hanna þægileg og smart föt fyrir karlmenn sem stunda íþróttir. Af hverju mega konur ekki líka vera töff í ræktinni? Konum á að líða vel í líkamsræktinni. Það skiptir máli," sagði Stella.