Dyah vill vera dagskrárstjóri

„Ég hef nýtt menntun mína á vinnumarkaðinum, en ég hef alltaf haft áhuga á því,“ segir hin 29 ára gamla Dyah Anggraini, sem er ein af 37 umsækjendum um starf dagskrárstjóra Sjónvarpsins.

Dyah er frá Indónesíu, en flutti til Íslands árið 2008 og er gift íslenskum manni. Hún er vel menntuð í fjölmiðlafræðum og keppir við margar kanónur um starfið, en Egill Helgason, Maríanna Friðjónsdóttir, Felix Bergsson og Sigurjón Kjartansson eru á meðal umsækjenda.

„Ég hef alltaf haft áhuga á fjölmiðlum og er með masterspróf í blaðamennsku frá háskólanum í Westminster á Englandi,“ segir Dyah. Hún var að stíga út úr tíma í Háskóla Íslands þegar Fréttablaðið náði í hana, en þar er hún í MBA-námi í viðskiptafræði. Sérsvið hennar á Englandi var fjölmiðlun með áherslu á sjónvarp og útvarp. „Ég lærði allt í sambandi við dagskrárgerð, frá því að þáttur er skrifaður þangað til hann er sendur út.“

Dyah sækir íslenskunámskeið í HÍ og hefur náð fínum tökum á tungunni, þó hún geri lítið úr því sjálf. „Mér finnst tungumálið erfitt, þannig að ég læri hægt,“ segir hún og hlær.

Dyah er búin að vera í atvinnuleit síðastliðið ár og segir leitina ganga hægt. Hún segist vissulega hafa getið valið betri tímasetningu en árið 2008 til að koma til Íslands í atvinnuleit. „Ég vann í banka og það er ekki hjálplegt að vera með það á ferilskránni,“ segir hún og hlær. „En ég elska Ísland, það er svo fallegt land. Ég gefst ekki upp á því strax.“ - afb