Samgönguráðherra endurskoði hugmyndir um sameiningu

Starfsmenn Siglingastofnunar Íslands vilja að Kristján Möller, samgönguráðherra, endurskoði hugmyndir sínar um sameiningu samgöngustofnana.

Starfshópur var skipaður í haust til að undirbúa sameiningu samgöngustofnana í framhaldi af skýrslu nefndar um framtíðarskipan stofnana samgöngumála, sem ráðherra skipaði í janúar 2009 í framhaldi af stjórnsýsluúttekt Ríkisendurskoðunar um samgönguframkvæmdir frá júní 2008. Starfsmenn Siglingastofnunar hafa tekið þátt í starfi hópsins.

Í ályktun starfsmannafundar Siglingastofnunar segir að úttekt Ríkisendurskoðunar hafi verið gerð eftir ýmsar uppákomur vegna stjórnsýslu samgönguráðuneytisins og Vegagerðarinnar í tengslum við kaup og endurbætur á Grímseyjarferju. „Hugmyndir um sameiningu samgöngustofnana eiga sér því frekar upphaf í þeirri ferju, fremur en í bankahruni eða þáttur í sparnaði í ríkisrekstri eins og ráðuneytið vísar nú til."

Leið ráðherra styrkir ekki samgöngustofnanir



Í ályktuninni segir að Kristján hafi lýst þeirri skoðun sinni með starfsmönnum stofnunarinnar að starfshópnum yrði falið að útfæra og undirbúa að setja á fót annars vegar Stjórnsýslustofnun samgöngumála og hins vegar Framkvæmdastofnun samgöngumála. Auk þess yrði hópnum falið að skoða aðrar leiðir og meta hvort þær væru betri. Slíkt mat hafi hins vegar ekki enn farið fram.

„Ekki hefur verið sýnt fram á að sú leið sem samgönguráðuneytið kýs að fara geri samgöngustofnanir faglega sterkari eða hafi í för með sér samlegðaráhrif og hagræðingarmöguleika og ekkert kostnaðar- eða hagræðingarmat hefur enn verið gert vegna fyrirhugaðrar sameiningar," segir í ályktun starfsmanna Siglingastofnunar.

Í ljósi þess að allar leiðir hafa ekki verið skoðaðar og að hvorki hefur verið sýnt fram á að leið samgönguráðuneytis styrki samgöngustofnanir faglega né að hún hafi í för með sér samlegðaráhrif og hagræðingarmöguleika fyrir ríkissjóð hvetja starfsmenn Siglingastofnunar Kristján eindregið að skoða kostnaðarhliðina, aðrar leiðir og ávinning af samlegð með sameiningu.