Bond verður Blomkvist

Línur eru smám saman að skýrast með bandarísku endurgerðina af Karlar sem hata konur eftir Stieg Larsson. Brad Pitt virðist ekki ætla að leika rannsóknarblaðamanninn Mikael Blomkvist.

Daniel Craig þykir núna líklegastur til að hreppa hlutverk Mikaels Blomkvist, rannsóknarblaðamannsins hjá Millenium-blaðinu í Svíþjóð. Eins og áður hefur verið fjallað um hafa kvikmyndafréttamiðlar lýst því yfir að hlutverk Blomkvists og Lisbeth Salander, tölvuhakkarans snjalla, séu þau safaríkustu í bransanum og því hefur fjöldi stórstjarna lýst yfir áhuga sínum á að leika í myndinni. Samningurinn við Craig hefur enn ekki verið staðfestur en samkvæmt kvikmyndavefnum Deadline.com standa viðræður nú yfir. Stórt skarð var höggvið í dagskrá Daniels Craig þegar tilkynnt var um seinkunn á 23. Bond-myndinni vegna fjárhagsvandræða MGM-kvikmyndaversins og hann gæti því verið ansi spenntur fyrir þessu hlutverki Blomkvists.

Brad Pitt þótti um tíma langlíklegastur til að leika Blomkvist en leikarinn er auðvitað upptekinn við að sinna barnauppeldi og öðrum hlutverkum. George Clooney var einnig um tíma orðaður við hlutverkið en ekki er víst að aðdáendur bókanna hefðu sætt sig við slíkt val.

Það er bandaríski leikstjórinn David Fincher sem mun stjórna hlutunum á tökustað en nýlega kom þriðja bókin um ófarir Lisbeth Salander og baráttu Mikaels Blomkvist fyrir réttlæti út í Bandaríkjunum. Bókin sló umsvifalaust í gegn og fór beint á toppinn hjá New York Times.

Bandaríkjamenn hafa líkt og Evrópubúar kolfallið fyrir bókum Stiegs Larsson og Fincher, sem hefur leikstýrt kvikmyndum á borð við Seven og The Game, er því með ansi góðan efnivið í metsölumynd en búast má við þríleik líkt og Svíarnir gerðu sællar minningar með Noomi Rapace í aðalhlutverki. Rapace, sem ólst upp á Flúðum með móður sinni, hefur lýst því yfir að hún ætli sér ekki að leika í bandarísku útgáfunni þrátt fyrir að hafa hlotið mikið lof fyrir frammistöðu sína í sænsku myndunum. Hún hefur þó komið þeim skilaboðum á framfæri í viðtölum að Fincher ráði óþekkta leikkonu í hlutverk Salander en stjörnur á borð við Scarlett Johansson og Natalie Portman hafa verið orðaðar við hlutverkið.

freyrgigja@frettabladid.is