Tíu afreksnemar fá styrki

Tíu styrkir verða veittir úr Afreks- og hvatningarsjóði stúdenta Háskóla Íslands 16. júní næstkomandi. Um er að ræða styrki til nemenda sem náð hafa afburðaárangri á stúdentsprófi og innritast í Háskóla Íslands. Styrkirnir í ár eru veittir með stuðningi Happdrættis Háskóla Íslans. Hver styrkur nemur 300 þúsund krónum auk niðurfellingar skráningargjalds í Háskólann, sem er 45 þúsund krónur.

Þetta er í þriðja sinn sem styrkir eru veittir úr Afreks- og hvatningarsjóði stúdenta við Háskóla Íslands en sjóðurinn var stofnaður árið 2008. Umsóknarfrestur um styrki úr Afreks- og hvatningarsjóðnum fyrir þetta ár rennur út 5. júní næstkomandi.

Í fréttatilkynningu frá HÍ kemur fram að stjórn sjóðsins velur styrkhafana en við valið er einkum tekið mið af framúrskarandi námsárangri á stúdentsprófi. Einnig er horft til virkni í félagsstörfum og árangurs stúdenta á öðrum sviðum svo sem í listum og íþróttum.