K-Fed kemur Britney til varnar

Kevin Federline dúkkar upp í bandarískum fjölmiðlum með reglulegu millibili. Ekki þó vegna þess að þeir séu svo áhugasamir um dans-eða rappferil hans heldur af því að þeir vilja vita hvað honum finnist um hin og þessi mál sem tengjast fyrrum eiginkonu hans, popp-prinsessunni Britney Spears.

Federline, eða K-Fed eins og hann er jafnan kallaður, hefur aldrei legið á skoðunum sínum en það kom mörgum á óvart þegar hann óvænt tók upp hanskann fyrir Britney.

Fyrrum lífvörður hefur kært Britney fyrir kynferðislega áreitni í sinn garð og vanrækslu barna sinna. Lífvörðurinn, Fernando Flores, heldur því fram að Spears hafi fimm sinnum sært blygðunarkennd hans með kynferðislegum hætti og þar að auki fóðrað syni sína á krabbakjöti þrátt fyrir að búa yfir þeirri vitneskju að þeir væru með ofnæmi fyrir slíkum mat.

Federline segir þessar ásakanir út í hött en hann fer með forræði yfir strákunum tveim. Lögfræðingur Federline, Mark Vincent Kaplan, sagði við fjölmiðla að í huga skjólstæðings hans væru þessar ásakanir eingöngu settar fram með peninga í huga. „Hann veit að þessar ásakanir eru tilhæfulausar með öllu,“ sagði Kaplan en Federline fór fram á það við barnaverndaryfirvöld í Los Angeles að þau rannsökuðu málið. Niðurstöður þeirrar rannsóknar leiddu ekkert saknæmt í ljós.