Geir Ólafsson gerir plötusamning í LA

„Ég er að gera samning hérna út af upptöku á plötu,“ segir söngvarinn Geir Ólafsson, sem er staddur í Los Angeles.

Síðastliðið föstudagskvöld spilaði hann á hinum virta tónleikastað The Baked Potato ásamt eigandanum Don Randi, fyrrverandi píanista Franks Sinatra, og hljómsveit hans Quest. Þessir færu hljóðfæraleikarar koma til Íslands í ágúst til að taka upp plötu með Geir. Einnig nota þeir tækifærið og spila á Djasshátíð Reykjavíkur.

„Hugmyndin er sú að þetta verði gefið út hérna í Ameríku,“ segir Geir, sem er ákaflega þakklátur fyrir þetta tækifæri. „Ég fór í þetta verkefni bara rólegur og var ekki að biðja um neitt meira. Svo eftir konsertinn kemur maður til mín sem heitir Don Graham, sem er einn af mörgum upptökustjórum í Hollywood. Svo var fundur daginn eftir og tekin ákvörðun um að taka upp þessa plötu. Mér var bara boðið þetta og ég þáði það náttúrulega.“

Söngkonan Anna Mjöll sem hefur verið búsett lengi í Los Angeles var á meðal gesta á tónleikunum. „Þegar hún mætti þá leið manni betur fyrir konsertinn,“ segir Geir, sem tók tónleikana upp. Á nýrri heimasíðu hans, Geirolafsson.is, verður hægt að hlýða á hvernig til tókst. Kvöldið eftir söng hann síðan á þorrablóti Íslendinga í Los Angeles og þar var Don Randi, sem hefur unnið með honum undanfarin ár, heiðursgestur. - fb