Vinir Fishburne reyndu að stöðva klám dótturinnar

Klámmynd með dóttur leikarans Laurence Fishburne er farin í dreifingu. Hann ku vera eyðilagður maður yfir uppátækinu, en vinir hans reyndu að kaupa upp lagerinn af myndinni til að stöðva dreifingu hennar.

Eins og fram hefur komið í Fréttablaðinu lék dóttir leikarans Laurance Fishburne í klámmynd sem fór í dreifingu á dögunum. Samkvæmt fréttasíðunni TMZ reyndu vinir leikarans að koma í veg fyrir dreifingu myndbandsins með því að kaupa upp lagerinn. Þeir leituðu til stjörnulögfræðingsins Yale Galenter sem hafði samband við Steve Hirsch, forstjóra Vivid, framleiðanda myndbandsins. Tilboðið hljóðaði upp á milljón dollara, eða um 120 milljónir íslenskar. Allt kom þó fyrir ekki þar sem Hirsch og félagar höfðu þegar sent myndbandið í dreifingu.

Tímaritið People birti á dögunum viðtal við hina 18 ára gömlu Montana Fishburne. Ljóst er að hana hefur aldrei skort veraldleg gæði, þannig að peningar voru ekki ástæðan fyrir uppátækinu. Hún segir í viðtalinu að hún líti ekki á það sem stórmál að leika í klámmynd.

„Mig hefur alltaf langað til að gera þetta,“ sagði hún. „Ég hef alltaf verið sátt við líkama minn og kynþokka.“ Hún segist ekki vonast til þess að myndin verði til þess að hún fái hlutverk í hefðbundnum kvikmyndum og sjónvarpsþáttum, eins og raunin varð þegar klám með Paris Hilton og Kim Kardashian kom út. „Ég er ekki í klámi til að komast í leiklist,“ segir Fishburne. „Ég er í klámi vegna þess að mig hefur alltaf langað til þess.“

Laurence Fishburne hefur verið tilnefndur til Óskarsverðlauna og leikur aðalhlutverkið í CSI-þáttunum vinsælu. Dóttir hans ráðfærði sig ekki við hann áður en hún tók þessa afdrifaríku ákvörðun. „Það var búið að framleiða myndina þegar þau komust að þessu þannig að ég gaf þeim ekki tækifæri til að tala mig til,“ segir Fishburne, en hún flutti úr foreldrahúsunum þegar hún varð 18 að eigin sögn: „Til að geta gert það sem ég vil án þess að foreldrar mínir reyni að koma í veg fyrir það.“

atlifannar@frettabladid.is