Garðurinn gerir garðinn frægan

Gerður Kristný hlaut í gær Barna- og unglingabókaverðlaun Vestnorræna ráðsins fyrir skáldsöguna Garðinn. Gerður gleðst yfir athyglinni sem barna- og unglingabækur fá og ætlar að skrifa framhald að Garðinum.

„Þetta er auðvitað jákvætt, vekur athygli á Garðinum, sem og öðrum skrifum fyrir börn og barnamenningu almennt,“ segir Gerður Kristný um verðlaun Vestnorræna ráðsins. Ólína Þorvarðardóttir formaður ráðsins, og Dagný Kristjánsdóttir prófessor afhentu Gerði verðlaunin, sem nema um 1,2 milljónum íslenskra króna, við hátíðlega athöfn í Alþingishúsinu í gær.

Þetta er í fimmta skipti sem verðlaunin eru veitt en þeim er úthlutað annað hvert ár. Dómnefnd barnabókaverðlaunanna skipaði Oddfríður Marni Rasmussen frá Færeyjum, Vera Lise Rosing Olsen frá Grænlandi og Dagný Kristjánsdóttir frá Íslandi. Auk Garðsins voru barnabækurnar Várferðin til Brúnna eftir Rakel Helmsdal frá Færeyjum og Sila eftir Lana Hansen frá Grænlandi tilnefndar.

Í rökstuðningi dómnefndar segir meðal annars að Garðurinn sé „unglingabók, samtímasaga og fortíðarsaga, skrifuð af fagmennsku og sjaldgæfum glæsibrag,“ þar sem Íslandssagan leiki stórt hlutverk.

Bókin sló í gegn þegar hún kom út fyrir jólin 2008 og stendur til að gera kvikmynd eftir henni. Aðspurð hvort hún hyggist skrifa framhald segir Gerður svo vera. „Það væri asnalegt að gera það ekki,“ segir hún.

„Söguhetjan Eyja þurfti hins vegar að þola svo margt í Garðinum að ég þori ekki að leggja meiri byrðar á unglingsherðar hennar. Ég var því að pæla í að herja á einhverja aðra úr vinkvennahópi hennar. Ég er búinn að plotta þá sögu frá A til Ö og þarf bara að komast í að skrifa hana,“ segir Gerður sem telur að framhaldið gæti komið út fyrir þarnæstu jól.

bergsteinn@frettabladid.is