Sögulegir endurfundir í sjónmáli

Óskarsverðlaunaleikstjórinn Danny Boyle útilokar ekki að gera framhald af hinni mögnuðu Trainspotting sem var byggð á samnefndri bók Irvine Welsh. Myndin sló eftirminnilega í gegn í Evrópu og markaði upphaf að glæstum ferli Ewans McGregor. Boyle viðurkenndi á blaðamannafundi að þetta væri raunhæfur möguleiki en þetta þýddi að Boyle og McGregor yrðu að grafa stríðöxina. Leikstjóranum og leikaranum sinnaðist nefnilega þegar Boyle fékk Leonardo DiCaprio til að leika aðahlutverkið í The Beach.

Framhald af Trainspotting er til í líki bókarinnar Porno eftir Welsh. Á blaðamannafundinum gaf Boyle þeirri bók hins vegar ekki háa einkunn. Þar rekur Renton næturklúbb í Amsterdam og Begbie er nýkominn úr fangelsi og hyggst finna þann í fjöru sem sendi honum, nafnlaust, hommaklám. Sick Boy er hins vegar á góðri leið með að slá í gegn með nýja tegund af fullorðinsefni og Spud er að íhuga sjálfsmorð. Leikstjórinn vildi hins vegar ekki gefa upp neinar tímasetningar og það verður eflaust ekkert framhald ef McGregor neitar að taka þátt.