Milljónatjón hjá Munda

Ekki eru nema þrjár vikur síðan fatahönnuðurinn Mundi opnaði búð á Laugavegi en þrátt fyrir stuttan líftíma hefur búðin orðið fyrir barðinu á ræningjum tvisvar sinnum. Í vikunni var vetrarlína fatamerkisins hreinsuð af lager búðarinnar og Sigyn Eiríksdóttir, annar eigandinn og móðir Munda, heitir fundarlaunum þeim sem upplýst getur ránið.

„Samtals er þetta milljóna­tjón fyrir okkur,“ segir Sigyn en mæðginin urðu fyrir því óláni að brotist var inn í búðina aðfaranótt miðvikudags og hillurnar á lagernum tæmdar. Ræningjarnir fylltu sex stóra bláa IKEA-poka af fatnaði og tæmdu næstum því hillur lagersins. „Við eigum bara til það sem hangir á herðatrjám inni í búðinni en allur lager af vetrarlínunni er farinn,“ segir Sigyn.

Mundi sjálfur var á leiðinni heim frá París og að vonum sleginn við fregnirnar. Þetta er í annað sinn á rúmri viku sem brotist er inn í búðina en aðeins þrjár vikur er síðan hún opnaði á Laugaveginum. „Við getum þakkað fyrir að vera búin að afgreiða allar pantanir að utan en þetta er gríðarlegt tjón fyrir búðina og viðskiptavinina hér heima. Airwaves í næstu viku og jólin að koma,“ segir Sigyn og heldur áfram: „Það var brotist inn fyrir rúmri viku og þá voru hlutir eins og iPodar og tölvur teknir. Núna leit þetta hins vegar út eins skipulagt rán og vörurnar eflaust komnar í gám út á höfn og á leiðinni úr landi,“ segir Sigyn en næst á dagskrá hjá henni er að finna út hvernig þau geti bjargað búðinni. „Við ætlum að reyna að láta sauma fyrir okkur hérna heima til að eiga eitthvað til næstu daga.“

Ómar Arnarsson aðstoðar­yfirlögregluþjónn segir að málið sé í rannsókn en að lögreglan telji helst að þarna hafi verið á ferðinni ræningjar sem vissu hverju þeir gengu að. „Það sem er sérstakt við þetta innbrot er að þetta eru hönnunarflíkur sem eru ekki fyrir hvern sem er,“ segir Ómar og bætir við að það geti reynst ræningjunum erfitt að koma flíkunum í verð.

alfrun@frettabladid.i