Það er reynsla í famelíunni

Dóri DNA leikstýrir nýju leikverki Bergs Ebba Benediktssonar sem frumsýnt verður um helgina. Hann segist vera stressaður fyrir þessa frumraun sína en er sannfærður um að snilldarverk sé í fæðingu.

„Ég verð eiginlega aldrei stressaður. Ég er meira að segja oft kallaður Ísmolinn. En nú verð ég að viðurkenna að ég er stressaður," segir Halldór Halldórsson, betur þekktur sem Dóri DNA. Dóri er leikstjóri og höfundur leikgerðar í leikverkinu Klæði sem frumsýnt verður í nýja leikhúsinu Norðurpólnum úti á Seltjarnarnesi á sunnudaginn. Verkið er eftir Berg Ebba Benediktsson og það er Sprengjuhallarmaðurinn Snorri Helgason sem semur tónlistina. Leikarar í sýningunni eru Hjörtur Jóhann Jónsson, Ólafur Ásgeirsson, Sara Margrét Nordahl og Snorri Engilbertsson.

Dóri segir að leikritið hafi upphaflega verið einstaklingsverkefni sem hann vann að í námi sínu í Fræði og framkvæmd í Listaháskóla Íslands. Hann og Bergur Ebbi hafi svo ákveðið að vinna betur með leikritið. „Við höfum allir gert ýmislegt, ég, Bergur og Snorri, en þetta er alveg nýtt fyrir okkur öllum. Við erum samt bara kokhraustir enda getur maður ekki alltaf verið að vaða í grunnu lauginni. Þetta er líka kjörið tækifæri til að setja upp í þessu nýja leikhúsi."

Aðspurður segir Dóri að leikritið fjalli um tvo menn sem báðir eru að gera hosur sínar grænar fyrir sömu konunni. Þeir beita mismunandi aðferðum enda hefur hvert þeirra þriggja mismunandi sýn á lífið. „Þetta er lítil sýning sem tekur á mjög stórum málefnum," segir leikstjórinn. „Þarna eru margar álitlegar spurningar um ástina. Sýningin er hlý en með kómískum undirtón, eins og allt sem við gerum því við getum ekki tekið okkur alvarlega."

Móðir Halldórs er Guðný Halldórsdóttir kvikmyndaleikstjóri. Hann er því barnabarn nóbelskáldsins Halldórs Laxness. Dóri er spurður hvort fjölskyldan sé eitthvað með í ráðum. „Ég hef auðvitað leitað til fólksins í kringum mig og hef fengið mömmu og frændur mína til að aðstoða mig. Það er reynsla í fjölskyldunni."

Klæði verður sýnt sex sinnum á þremur dögum og svo verður sýningum bætt við ef vel gengur. Allar upplýsingar má finna hér á Miði.is. Dóri segir að fólk sem láti sjá sig verði ekki svikið. „Þetta er gott verk. Ég er sannfærður um að ég hafi það næmi sem þarf til að gera þetta. Og svo erum við með frábæra leikara og frábæran hóp. Það er á svona stundum sem snilldin verður til."

hdm@frettabladid.is