Passar sem lok á pott

Á morgun verður nýtt leik- og tónverk fyrir börn, Herra Pottur og ungfrú Lok, frumsýnt í Kúlunni, barnaleiksviði Þjóðleikhússins. Sýningin er bræðingur tónlistar eftir Bohuslav Martinu frá 1927 og sögu Christhophe Garda frá 2007 sem í fyrsta sinn er sögð í sviðsuppfærslu á Íslandi fyrir tilstilli Óperarctic félagsins.

Veröld herra Potts og ungfrúar Loks er allt í senn spennandi, undursamleg og heillandi öllum börnum allt frá fjögurra ára til hundrað og fjögurra. Með hjálp sex hljóðfæraleikara, að minnsta kosti jafnmargra brúða og einnar sögukonu, Sólveigar Simha, er áhorfendum fylgt hönd í hönd í ævintýralegt ferðalag um hið fagra draumaland Bohuslavs litla Martinus, drengs sem sér áhöldin í eldhúsinu lifna við. Ástir herra Potts og ungfrúar Loks fara nánast út um þúfur vegna afbrýðisemi daðurdrósarinnar Kvarnar. Pörupilturinn Klútur og hinn reglufasti herra Sópur dragast inn í atburðarás sem erfitt er að sjá fyrir endann á. Tónlistin segir einnig sögu, en það er saga djass, tangó, charleston og foxtrott.

Leikstjóri að verkinu er Ágústa Skúladóttir, en búninga, brúður og sviðsmynd skóp Katrín Þorvaldsdóttir. Sögumaður og leikari er Sólveig Simha.

Sýningardagar eru á morgun, 30. maí, 5. og 6. júní kl. 13 og 15. Ein sýning á frönsku 3. júní kl. 17. Sýningin er á dagskrá Listahátíðar í Reykjavík 2010 og er samstarfsverkefni Óperarctic félagsins og Þjóðleikhússins studd af Alliance française, Reykjavíkurborg, Tónlistarsjóði, Barnamenningarsjóði og Barnavinafélaginu Sumargjöf.

Herra Pottur og ungfrú Lok er listrænt og fræðandi verkefni fyrir börn. Það miðar að því að kynna fyrir þeim töfraheim sígildrar tónlistar og leihússins í senn. Óperarctic félagið, sem hefur það að markmiði að setja upp óhefðbundnar tónlistarsýningar, vill með þessari sýningu vekja áhuga ungra hlustenda á þessu einstaka listformi sem reynir á allt í senn, rödd, líkama og hljóðfæraleik. Herra Pottur og ungfrú Lok er annað leikverk félagsins en kammeróperan Hugstolinn var sett upp á Listahátíð í Reykjavík 2004 og fór í leikför um Norður-Evrópu.

Fyrir nokkrum árum samdi franski leikhúslistamaðurinn Christophe Garda sögu, ævintýri fyrir börn, út frá raddskrá Bohuslavs Martinus og var verkið frumflutt í tónleikauppfærslu ásamt sögumanni við enduropnun Salle Pleyel-leikhússins í París árið 2007. Sama ár tók Sólveig Simha þátt í upptökum á vegum franska útgefandans Intrada á tónaævintýrinu. Hlöðver Ellertsson þýddi söguna á íslensku og í framhaldi af því ákvað Óperarctic félagið að setja verkið upp hér á landi. Sviðsuppfærsla Óperarctic félagsins í Þjóðleikhúsinu á sögu Garda við tónlist Martinus er sú fyrsta sinnar tegundar.

Með hjálp sex hljóðfæraleikara, að minnsta kosti jafnmargra brúða og einnar sögukonu, Sólveigar Simha, er áhorfandinn leiddur hönd í hönd í ævintýralegt ferðalag um hið fagra draumaland Bohuslavs litla Martinus.

pbb@frettabladid.is