Vongóðir karlmenn biðu í röð út á götu

Elite skrifstofan á Íslandi hélt nýverið mikla leit hér á landi eftir næsta andliti bandaríska tískumerkisins Calvin Klein. Leitað var af íslenskum karlmönnum á aldrinum 16 til 30 ára og að sögn Ingibjargar Finnbogadóttur, framkvæmdarstjóra Elite skrifstofunnar á Íslandi, sóttu tæplega tvöhundrað manns prufuna.

„Við vorum mjög vongóðar í upphafi leitarinnar og bjuggumst við hátt í fjörtíu manns. Raunin varð aftur á móti önnur því fimm mínútum fyrir auglýstan tíma var stigagangurinn troðfullur af strákum og náði röðin alla leið út á götu,“ segir Ingibjörg og bætir við að hálf tíma síðar hafi um hundrað manns beðið í röðinni.

Ingibjörg rekur Elite skrifstofuna ásamt Tinnu Aðalbjörnsdóttur og unnu þær stöllur langt frameftir kvöldi við að mynda alla þá myndarlegu pilta sem mættu í prufurnar. „Við vorum að mynda þá til klukkan tíu um kvöldið og erum núna að klára að vinna úr umsóknunum eftir fyrirmælum frá Calvin Klein,“ segir Ingibjörg sem bjóst við að ljúka því verkefni í gær. Sérstakur útsendari á vegum Calvin Klein aðstoðar stúlkurnar við valið. Sú heitir Barbara Pfister og hefur meðal annars séð um að velja fyrirsætur handa íþróttavöruframleiðandanum Adidas, Levi‘s, tölvufyrirtækinu IBM, tískuhúsinu Fendi og Vogue tímaritinu.

Aðspurð segir Ingibjörg þær hættar að taka á móti umsóknum í þetta umrædda verkefni en segist taka á móti karlmönnum sem hafa áhuga á að komast á skrá hjá fyrirtækinu strax eftir helgi. „Það er enn verið að hringja í okkur útaf þessu verkefni en við erum hætt að taka á móti umsóknum í það. Eftir helgi tökum við á móti öllum þeim sem hafa áhuga á að komast á skrá hjá okkur, þeir eiga þá séns á að komast að í öðrum verkefnum,“ segir hún að lokum. -sm