Frægur hakkari í Bláa lóninu í dag

Félag íslenskra tölvuleikjaframleiðenda heldur upp á ársafmæli sitt í Bláa lóninu í dag. Þar verður haldin ráðstefna þar sem lykilfyrirlesararnir eru þeir Pablos Holman og Jason Della Rocca.

Holman er frægur hakkari og sérfræðingur í öryggismálum, sem hefur einnig unnið við smíði geimflauga. Rocca er eftirsóttur fyrirlesari eins og Holman og hefur stýrt Alþjóðasamtökum tölvuleikjaframleiðenda í níu ár.

„Það er bæði heiður og ánægja að fá þá Pablos og Jason í heimsókn. Það verður lærdómsríkt að hlusta á fyrirlestra þeirra og annarra sem þarna koma fram,“ segir Erla Bjarney Árnadóttir, formaður Félags íslenskra tölvuleikjaframleiðenda. Hún er að vonum spennt fyrir ráðstefnunni. „Þetta er í fyrsta sinn sem við fáum tækifæri til að hittast öll í þessum geira hér á landi og velta fyrir okkur framtíðinni, bæði út frá sjónarmiðum okkar Íslendinga sem og því sem er að gerast úti í heimi,“ segir hún.

Sex fyrirtæki eru meðlimir í Félagi íslenskra tölvuleikjaframleiðenda og varlega áætlað starfa rúmlega 450 manns í þessum geira hér á landi. Flestir starfa hjá CCP, eða um 280 manns. Hjá Gogogic starfa um 40 manns og hjá Betware starfa um 75 manns.

„Þetta er orðinn nokkuð fjölbreyttur iðnaður sem hefur alla burði til að vaxa frekar. Sem dæmi má nefna að miðað við hina margfrægu höfðatölu jafngildir þetta um 400 þúsund störfum í Bandaríkjunum og um 90 þúsund störfum í Þýskalandi,“ segir Erla.

„Hér á landi hefur verið stöðugur vöxtur síðustu tíu ár, þó svo að ákveðin sprenging hafi orðið upp úr 2008.“ - fb