Fyrsta sólóplata Gímaldíns í átta ár

Tónlistarmaðurinn Gímaldin og hljómsveit hans halda tónleika á Rosenberg þriðjudaginn 6. apríl. Tilefnið er útgáfa þriðju sólóplötu hans og þeirrar fyrstu í átta ár, Sungið undir radar.

„Þetta er unnið upp úr sarpinum sem safnaðist þegar ég var í Rússlandi,“ segir Gímaldin, sem heitir réttu nafni Gísli Magnússon. Hann flutti heim frá Rússlandi fyrir ári, eftir að hafa dvalið þar í tæp fjögur ár við nám í svæðafræði og rússnesku. „Þessi tími gaf vel af sér því efnið sem er til kemst á fjórar plötur og tvær eru þegar komnar út,“ segir hann og á þar við nýju plötuna og tíu laga leyniplötu sem fylgir í kaupbæti með geisladiska-útgáfu hennar.

Sungið undir radar, sem kemur einnig út á netinu, hefur að geyma rólegheita popprokk eins og heyrist í laginu Ljúlja sem Lára Sveinsdóttir syngur. Hægt er að hlusta á það á síðunni Gimaldin.com. Með Gímaldin spila á tónleikunum á Rosenberg gítarleikarinn Gísli Már og trommarinn Þorvaldur Gröndal. Lög af nýju plötunni verða ekki flutt heldur efni af næstu plötu á eftir. „Þetta tríó er að taka upp annað efni og við ætlum að spila það, því þetta band sem tók upp poppplötuna var aldrei starfrækt. Kannski, þegar við kynnum næstu plötu, spilum við lög af þessari,“ segir Gímaldin. - fb