Myndaði sölukonur í Tógó

Ljósmyndasýningin Sölukonurnar í Tógó eftir Öldu Lóu Leifsdóttur verður opnuð í dag í tilefni af Hátíð franskrar tungu. Alda Lóa skráði heim kaupkvennanna í Lomé í Tógó í nokkrum ferðum þangað á árunum 2006 til 2009 og afraksturinn verður nú til sýnis.

„Það var rosalega gaman að taka myndir í Afríku. Þar var eitthvað allt annað fyrir sjónum mér en mannlífið á götunum hér,“ segir Alda Lóa. „Bæði það og svo eru það litirnir og samsetningin sem eru svo villt.“ Hún segir að sölukonurnar hafi spurt sig hvers vegna hún vildi ekki mynda þær í sínu fínasta pússi í stað vinnugallans og ætlar hún að verða við þeirri beiðni síðar á þessu ári þegar hún fer aftur til Afríku.

Alda Lóa hefur unnið sem fréttaljósmyndari á íslenskum og dönskum fjölmiðlum. Hún er aðstandandi Sóleyjar og félaga, sem er stuðningsfélag barnaheimilis og skóla í Tógó. Ljósmyndirnar verða til sölu og rennur andvirðið í sjóð til byggingar heimilis fyrir munaðarlaus börn í Anehó í Tógó.

Ingibjörg Sólrún Gísladóttir mun opna sýninguna í dag klukkan 17.30 í húsnæði Alliance Française við Tryggvagötu. Sýningunni lýkur svo 11. apríl. - fb