Keppast við að hreinsa ösku af þökum

Undir Eyjafjöllum keppast slökkviliðsmenn við að hreinsa ösku af þökum. Þótt flestir vonist eftir því að nú fari að rigna duglega umbreytir bleytan öskunni í þykkan leir sem enginn hægðarleikur er að þrífa burt.

Slökkviliðsmenn takast á við mikið og erfitt verkefni um þessar mundir þar sem þeir aðstoða íbúa sem hart eru leiknir út af eldgosinu í Eyjafjallajökli við þrif. Allt á kafi í ösku, sem reyndar er orðin af þykkum og ógeðfelldum leir sem svo þyrlast upp þegar þornar.

Slökkviliðsmenn voru á svæðinu í dag til að aðstoða íbúana en jafnvel þótt menn séu búnir háþrýsti slöngum er verkið erfitt enda engir brunahanar í nánd líkt og gerist í þéttbýli.

„Þetta tekur svolítinn tíma. Aðalmálið er að við þurfum að sækja vatnið austur að Skóga," segir Jörgen Valdimarsson, varðstjóri hjá slökkviliði höfuðborgarsvæðisins. Hver farmur nýtist í rúma klukkustund.