Forsetinn á Skagaströnd

Fræðasetur Háskóla Íslands á Norðurlandi vestra þjófstartar 200 ára afmælisdagskrá Jóns forseta Sigurðssonar og stendur fyrir málþingi 12. september í Bjarmanesi á Skagaströnd. Þingið ber yfirskriftina „Framtíð Jóns Sigurðssonar – Karlar á stalli og ímyndasköpun“. Þar munu einmitt nokkrir karlar stíga á stall og ræða með hvaða hætti minningin um Jón forseta sem leiðtoga Íslendinga í sjálfstæðisbaráttunni varð til og mótaðist í íslensku samfélagi á fyrstu áratugunum eftir andlát hans.

Þrír sagnfræðingar og bókmenntafræðingur flytja erindi á þinginu. Sigurður Gylfi Magnússon ræðir minningarframleiðslu samtímans, Páll Björnsson fjallar um endurfæðingar Jóns Sigurðssonar, Guðmundur Hálfdanarson ræðir um Jón og stofnun Háskóla Íslands, en Jón Karl Helgason flytur erindi um hrókeringar á íslenskum þjóðardýrlingum.

Í lokin verður góður tími til umræðna. Gestir geta haldið áfram að skeggræða Jón Sigurðsson og áhrif hans í Kántrýbæ um kvöldið.