Þjóðlagahátíð aftur árið 2011

Þjóðlaga- og heimstónlistarhátíðin Reykjavik Folk Festival var haldin í fyrsta sinn um síðustu helgi á Café Rosenberg og gekk hún eins og í sögu. Miklar líkur eru á að hún verði endurtekin að ári.

„Það er ekkert búið að ákveða enn þá en ég geri fastlega ráð fyrir því,“ segir Ólafur Þórðarson, sem skipulagði hátíðina ásamt félögum sínum úr hljómsveitinni South River Band. Tilefnið var tíu ára afmæli sveitarinnar og stóðu þeir sjálfir straum af mestum kostnaðinum sem nam um 7-8 hundruð þúsund krónum. 150 þúsund króna styrkur frá Reykjavíkurborg kom þó að góðum notum. „Það hjálpar gríðarlega upp á. Ég held að við séum nokkurn veginn á sléttu,“ segir Ólafur, sem stóð í ströngu í miða­sölunni ásamt hinum hljómsveitarmeðlimunum.

Fjórtán hljómsveitir stigu á svið, þar á meðal Varsjárbandalagið, Spaðar, KK og South River Band. Spænsk sjónvarpsstöð, sem var stödd í Reykjavík til að mynda næturlífið, var á hátíðinni á föstudagskvöldinu þegar mesta stuðið var og náði myndum af því sem fram fór. - fb