Natalie leikur druslulega Mjallhvíti

Natalie Portman er sögð eiga að leika Mjallhvíti í nýrri og fremur óhefðbundinni útgáfu af þessu fræga ævintýri. Leikstjóri Amelie, Jean-Pierre Jeunet, er sagður ætla að setjast í leikstjórastólinn en framleiðendur verða þeir Brett Ratner og Ryan Kavanaugh.

Samkvæmt fyrstu fréttum er ráðgert að myndin verði í þrívídd. Ekki hefur þó verið greint formlega frá ráðningu Portman enda hefur ekki verið skrifað undir neina samninga.

Samkvæmt fyrstu fréttum á þessi útgáfa af Mjallhvíti að vera nokkuð frábrugðin þeirri sem Walt Disney gerði 1937. Mjallhvít á að vera hálfgerð drusla, dvergarnir eiga ekki að vera námuverkamenn heldur þjófagengi og svo var víst dreki í upphaflegu ævintýri Grimm-bræðranna. „Þetta er mynd sem á eftir að sameina gamla og nýja aðdáendur ævintýramynda," sagði Kavanaugh í samtali við fjölmiðla.