Skuldar skattinum

Staðarblaðið Chaska Herald í Minnesota greindi frá því í gær að tónlistarmaðurinn Prince væri skuldum vafinn. Samkvæmt blaðinu skuldar hann og fyrirtæki tengd honum rúma fimm hundruð þúsund dollara eða 66 milljónir íslenskra króna í fasteignagjöld og aðrar skatttengdar greiðslur.

Chaska Herald segir frá því að samkvæmt skattskýrslum Carver-sýslunnar í fylkinu hafi listamaðurinn sérlundaði ekki greitt þessi gjöld á síðasta ári.

Mestu munar um að upptökufyrirtæki Prince, PRN Music Corp, skuldar rúmlega 220 þúsund dollara í skatt. Prince hefur verið gefin frestur til 1. apríl til að andmæla þessari uphæð. Ef hann gerir það ekki verður hann fyrir barðinu á svokölluðu fjárnámi. Prince hefur hins vegar tíma til 1. maí 2013 að greiða upp þessa skuld án þess að gengið verði á persónulegar eigur hans.