Þjóðin velur Mottumeistara Krabbameinsfélagsins árið 2010

Söfnunarátakinu Karlmenn og krabbamein - Mottu-mars lýkur í kvöld með söfnunarþætti í beinni og opinni dagskrá á Stöð 2. Yfir 2.400 manns og 500 lið skráðu sig til leiks á karlmennogkrabbamein.is. Arion banki vann liðakeppnina. Efstu 5 motturnar í einstaklingskeppninni berjast til úrslita í beinni útsendingu.

Örar sviptingar hafa verið í toppsætunum á vef Mottumars en sigurlið Arion banka skaust upp fyrir lið Actavis ONE á bókstaflega síðustu mínútu þegar lokað var fyrir áheit kl. 14:00 í gær. Safnast hafa yfir 26 milljónir króna til stuðnins átakinu en söfnunarféð verður notað til styrktar rannsóknar- og forvarnarstarfi Krabbameinsfélagsins.

Mottumeistari Krabbameinsfélagsins árið 2010 verður valinn í símakosningu

Það er svo íslenska þjóðin sem velur Mottumeistara Krabbameinsfélagsins árið 2010 með símakosningu í söfnunarþætti á Stöð 2 í kvöld. Fólk kýs þannig sína eftirlætis „mottu" úr hópi hinna fimm efstu úr einstaklingskeppninni, en margir kannast við slíkt fyrirkomulag úr keppnum á borð við Idol keppnina. Efstu keppendurnir eru:

• Rúnar Sigurðsson

• Sveinn Magni Jensson

• Hinrik Greipsson

• Hilmar Harðarson

• Guðlaugur V. Antonsson

Margir af helstu skemmtikröftum landsins koma við sögu í þættinum en hann verður í beinni útsendingu og opinni dagskrá - svo þjóðin öll geti fylgst með og tekið þátt í lokaátakinu.

Meðal skemmtikrafta sem koma fram má nefna Hjálma, Baggalút, Jón Gnarr, Pétur Jóhann, Þorstein Guðmundsson, Karlakórinn Fóstbræður, Nýja dönsk, Sálina hans Jóns míns, Egil Ólafsson og Gunnar „Frímann" Hansson auk grínatriða eftir þá „-vaktarhöfunda" Sigurjón Kjartansson og Jóhann Ævar Grímsson.

Þetta er einungis toppurinn á ísjakanum en í þættinum verður fjöldinn allur af athyglisverðum viðtölum, kraftakeppnum ásamt bílahorni og mörgu öðru. Þátturinn verður undir stjórn Loga Bergmann, en Vilhelm „Naglbítur" Anton Jónsson stendur vaktina í símaverinu.