Cheryl á HM

Samkvæmt breska blaðinu Daily Star mun Cheryl Cole fara á HM í knattspyrnu en ekki fráfarandi eiginmaður hennar, Ashley Cole. Cheryl hefur gert samning við tónleikahaldara í Suður-Afríku, þar sem keppnin fer fram, um að troða upp á tónleikum með hipp/hopp-hljómsveitinni Black Eyed Peas á sérstökum upphitunartónleikum fyrir opnunarleik keppninnar sem fer fram 10. júní í Jóhannesarborg.

Ashley, sem var fastamaður í enska landsliðinu og milljarðaliði Chelsea, ökklabrotnaði í leik á móti Everton fyrr á þessu ári og ekki er talið líklegt að hann verði valinn í enska landsliðið sem tekur þátt í heimsmeistaramótinu. Ashley hefur engu að síður verið í stífri meðferð við meiðslunum og mun víst ætla að fórna öllu til að komast til Suður-Afríku.

Breskir fjölmiðlar hafa velt því mikið fyrir sér hvort og þá hvenær formleg tilkynning um skilnað Ashley og Cheryl verði gefin út en söngkonan hefur ítrekað sést án giftingarhringsins í fjölmenni.