Hopper skilur við konuna til að lengja lífið

Leikarinn Dennis Hopper verður þess heiðurs aðnjótandi að fá nafn sitt ritað á gangstéttina í Hollywood í dag. Þetta eru þó einu góðu fréttirnar sem leikarinn hefur fengið nýlega því hann berst nú við krabbamein í blöðruhálskirtli og segir talsmaður hans að hann eigi aðeins fáar vikur eftir ólifaðar.

Til að bæta gráu ofan á svart stendur Hopper nú í skilnaði við eiginkonu sína en fréttirnar af krabbameininu komust einmitt í sviðsljósið þegar skilnaðurinn var tekinn fyrir af dómara í vikunni.

Það var Hopper sjálfur sem sótti um skilnað frá konu sinni Viktoríu en þau hafa verið gift í 14 ár og eiga saman 6 ára dóttur. Hopper fór fram á skilnaðinn til þess að geta einbeitt sér betur að baráttunni við krabbameinið, að því er fram kom þegar málið var tekið fyrir.

„Því minna sem Hopper hefur af konu sinni að segja, því líklegra er að hann nái að lengja líf sitt," segir lögmaður hans. Lögfræðingurinn fullyrðir að Viktoria hafi lagt sig fram við að auka á stress leikstjórans með hegðun sinni þrátt fyrir að hafa verið fullkunnugt um veikindin.