Útvarpsstöð lokað á Akureyri

„Við erum ekkert hættir,“ segir Gunnar Torfi Steinarsson, einn af þremur grunnskólapiltum á Akureyri sem eru eigendur hinnar nýstofnuðu netútvarpsstöðvar Brekkunnar.

Stef, samband tónskálda og eigenda flutningsréttar, krafðist þess á dögunum að stöðinni yrði lokað vegna þess að láðst hafði að borga fyrir lögin sem hún spilaði.

„Við vissum ekkert af þessu. Þegar við opnuðum áttuðum við okkur á því að það þyrfti að borga,“ segir Gunnar Torfi. Í framhaldinu ákváðu Gunnar og félagar að óska eftir fjárframlögum og viðbrögðin hafa verið góð. „Við erum komnir með rúmlega átján þúsund krónur. Það er líklegast nóg út þennan mánuð. Við ætlum líka bara að hafa opið um helgar. Það sparar rosalega peninga.“

Gunnar er ákaflega svekktur yfir því að hafa þurft að loka stöðinni en vonast til að hún opni aftur um helgina. „Við ætluðum að gera unglingunum á Akureyri greiða og skemmta okkur í leiðinni,“ segir hann og nefnir að um 150 manns hafi hlustað á stöðina. „Þetta ætti að vera þannig að ef það eru yfir þúsund hlustendur þá myndu þeir byrja að rukka en það eru bara 150. Þess vegna er þetta svo óréttlátt.“

Stutt er síðan önnur netútvarpsstöð á Akureyri, Toppfm.is, þurfti að loka vegna sambærilegra aðgerða Stefs. - fb