Gaga-met

Bandaríska söngkonan Lady Gaga hefur enn og aftur skráð nafn sitt í sögubækurnar. Þessi sérvitra söngkona frá New York er nefnilega fyrsti listamaðurinn sem nær yfir einum milljarði áhorfenda á myndbönd sín á YouTube. Þetta kemur fram á tölfræðisíðunni Visible Measures. Samkvæmt umræddri síðu hafa tæplega fjögur hundruð milljónir séð Poker Face, 272 milljónir hafa horft á Just Dance og 360 milljónir hafa fundið Bad Romance.

Lady Gaga mun þó eflaust ekki ná að halda þessu meti lengi því 980 milljónir hafa séð myndbrot úr Twilight-myndunum og 860 milljónir hafa leitað eftir smellum Soulja Boy's.