Guðlaugur ætlar að upplýsa hverjir létu hann fá 25 milljónir

Guðlaugur Þór Þórðarson, þingmaður Sjálfstæðisflokksins og fyrrverandi heilbrigðisráðherra, ætlar að upplýsa hverjir styrktu hann í prófkjöri þegar hann þáði 24,8 milljónir króna í styrki fyrir kosningarnar 2007. Enginn þáði hærri styrki samkvæmt upplýsingum Ríkisendurskoðunar. Guðlaugur hefur hingað til ekki viljað gefa upp hverjir veittu þessa styrki. Undanfarnar vikur hefur verið eftir afsögn Guðlaugs og mótmælt við heimili hans.

Í Kastljósi í kvöld sagðist Guðlaugur hafa þegið umrædda styrki á grundvelli nafnleyndar. „Ég hef hins vegar ákveðið að fylgja því eftir og kanna það hjá öllum þeim aðilum, sem voru um 40 talsins, sem styrktu þetta prófkjör og hvort þeir séu fáanlegir til að gefa upp sín nöfn. Ég mun birta það mjög fljótlega," sagði Guðlaugur og bætti við að hann ætli í framtíðinni ekki að þiggja nafnlausa styrki. Þá sagðist Guðlaugur hafa farið eftir ströngustu reglum.

Guðlaugur sagðist telja að hann njóti trausts til að sitja áfram sem þingmaður. Líkt og fram kom í Fréttablaðinu í gær hefur hann ekki hugleitt að segja af sér þingmennsku þrátt fyrir háværa kröfu um að þeir sem þáðu hæstu prófkjörsstyrkina víki af Alþingi.

Tilviljun

Í viðtalinu í Kastljósi var Guðlaugur spurður út í umtalaða veiðiferð í Miðfjarðará í ágúst 2006. Þar var hann ásamt þremur aðalleikendum í REI-málinu svokallaða ásamt fjármálastjóra Baugs. Þetta voru þeir Vilhjálmur Þ. Vilhjálmsson fyrrverandi borgarstjóri, Haukur Leósson fyrrverandi stjórnarformaður Orkuveitunnar og Björn Ingi Hrafnsson fyrrverandi varaformaður stjórnar Orkuveitunnar og REI. Fjármálastjóri Baugs á þessum tíma var Stefán Hilmarsson núverandi fjármálastjóri 365.

Rúmlega mánuði eftir veiðiferðina komu upp á yfirborðið hugmyndir um að sameina REI og GGE en síðarnefnda félagið var að langstærstum hluta í eigu Baugs í gegn um eignarhlut sinn í FL Group.

„Já, að sjálfsögðu er það tilviljun. Ég kom þarna á síðustu mínútu og þessi mál voru ekki rædd með nokkrum einasta hætti," sagði Guðlaugur þegar hann var spurður út í málið í kvöld.