Færri miðar en meiri gróði

Hagnaður kvikmyndahúsa í Bandaríkjunum jókst um hundrað milljónir dollara, rúma tólf milljarða íslenskra, frá því í fyrra þrátt fyrir að kvikmyndahúsagestum hafi fækkað umtalsvert. Þeir hafa raunar ekki verið færri síðan 2005 en alls voru 552 milljónir bíómiða seldar á þessu ári. Talið er að þar skipti mestu að kvikmyndahúsin eru farin að rukka hærra miðaverð á hinar svokölluðu þrívíddar-myndir en varla hefur verið þverfótað fyrir slíkri kvikmyndagerð á þessu ári eða síðan Avatar sló hvert miðasölumetið á fætur öðru.

Samkvæmt frétt á BBC hefur miðaverð hækkað um fimm prósent og borga því kvikmyndahúsagestir að meðaltali 7,88 dollara fyrir miðann eða 955 krónur. Svipuð þróun hefur verið í gangi í Bretlandi og hefur hún verið rakin beint til þrívíddar-byltingarinnar. Eina myndin sem náði einhverjum verulegum vinsældum var Toy Story 3 en stórmyndir á borð við Sex and the City 2, Prince of Persia og The Sorcerer"s Apprentice náðu engan veginn að standa undir væntingum.

„Sem kvikmyndagerðarmaður hlýtur þú að vilja örva aðsókn, ekki draga úr henni,“ segir miðasölusérfræðingurinn Paul Dergarabedian við fréttavef BBC. „Hollywood mistókst að hrífa áhorfendur sem svöruðu kallinu með fjarveru sinni,“ bætir Paul við.