Mikið líf í Latabæ

Mikið líf hefur verið í höfuð­stöðvum Latabæjar undanfarna daga. Þar hafa staðið yfir upptökur á nýrri þáttaröð sem verður með eilítið öðruvísi sniði en aðdáendur Latabæjar hafa átt að venjast og svo var tilkynnt um stofnun Íþróttaskóla Latabæjar.

Það gekk mikið á þegar ljósmyndara Fréttablaðsins bar að garði um hádegisbilið í gær en þá var verið að taka upp dansspor með ungum og efnilegum dönsurum. Fótafimin leyndi sér ekki og einbeitnin skein úr hverju andliti.

Um tvö leytið skrifuðu Einar Karl Birgisson, svæðisstjóri Latabæjar á Íslandi, og Þröstur Jón Sigurðsson, eigandi Sporthússins, undir samstarfssamning milli Sporthússins og Latabæjar um stofnun Íþróttaskóla Latabæjar.

Fram kemur í fréttatilkynningu sem var send af þessu tilefni að Íþróttaskóla Latabæjar er ætlað að upplýsa börnin um mikilvægi heilbrigðs lífsstíls.

Þegar hefur verið gengið frá ráðningu skólastjóra Íþróttaskóla Latabæjar en hún heitir Heiða Björk Ásbjönsdóttir. Um miðjan september verður boðið upp á námskeið í Sporthúsinu Mosfellsbæ, Seltjarnarnesi og á Selfossi.