Æðislegar áheyrnarprufur

Áheyrnarprufur fyrir nýjasta myndband Haffa Haff voru haldnar á Austur á dögunum. Óskað var eftir myndarlegum körlum í prufurnar og þeir létu sig ekki vanta.

„Það var helling af æðislegum strákum sem mættu,“ segir Haffi Haff, sem var ánægður með þátttökuna í áheyrnarprufum fyrir myndband sitt. Hátt í tuttugu strákar, í góðu formi og óhræddir við myndavélar, mættu á staðinn og sýndu sig fyrir Haffa og dómnefnd hans. Hún var skipuð einvalaliði, eða rapparanum Emmsjé Gauta, hönnuðinum Sir Hákoni Hildibrand, Völu Grand, Atla Frey, Díönu Omel og að sjálfsögðu Haffa sjálfum. „Þetta var frábær hópur og þegar ég leit yfir hann minnti hann mig dálítið á Americas Next Top Model-þáttinn,“ segir Haffi. Eftir prufurnar var síðan haldið partí þar fólk fékk tækifæri til að kynnast betur.

Myndband Haffa, við lagið Dirty Side, verður tekið upp um næstu helgi í Reykjavík og fer það í loftið um tveimur vikum síðar. „Ég hlakka mikið til. Ég vil að þetta verði kúl, ferskt og öðruvísi myndband. Mig langar að segja sögu og setja hlutina upp á ákveðinn hátt fyrir fólk. Mig langar að setja mark mitt á þetta myndband.“ -fb