Dularfullt partí framundan

Fréttablaðið greindi frá því í gær að mikill titringur er á meðal ákveðins hóps í Reykjavík þessa dagana vegna risapartís sem verður haldið í Reykjavík í lok ágúst.

Við höfðum samband við plötusnúðinn Margeir Ingólfsson sem staðfesti að Saltfélaginu verður breytt í klúbb 27. ágúst næstkomandi og munu veigarnar fljóta eins og þær gerðu í frægum partíum fyrir tveimur til þremur árum.

Þegar við spurðum Margeir nánar út í þennan dularfulla viðburð var fátt um svör.

„Ég vil ekki gefa of mikið upp en ég get staðfest það að ég hef verið fenginn til að stýra tónlistinni sem fer fram þetta kvöld með því að velja þá listamenn sem koma fram ásamt því að koma fram sjálfur og ég get sagt þér að ég er búinn að bóka nýju uppáhalds hljómsveitina mína án þess að ljóstra upp hver hún er," svaraði Margeir.

„Þetta er partí sem er kostað af Smirnoff. Þeir eru að leggja til fjármuni í það að skemmta fólki og ég setti fram ákveðnar kröfur um að umgjörðin yrði mjög flott eins og ljósabúnaður og hljóðkerfi svo sómi sé af og það sé þess virði að tengjast þessum stóra viðburði."

Hverjum er boðið í þetta dularfulla partí? „Það er sá hluti af þessu dæmi sem ég tengist hvað minnst eða ákveð ekki en þetta er partí eingöngu fyrir boðsgesti. Saltfélagið tekur hundruði manna þannig að þetta verður ágætlega stórt," sagði hann.

„Það verður settur upp svokallaður Smirnoff klúbbur og ég get staðfest það. Síðan þessi moli í Fréttablaðinu birtist hafa margir spurt mig af hverju ég sé ekki búinn að bjóða þeim í þetta partí og ég veit að það eru einhverjar tilraunir farnar af stað hjá fólki að verða sér úti um miða."