Leikarabörn í Herranótt

Herranótt, leikfélag Mennta­skólans í Reykjavík, frumsýnir LoveStar í kvöld. Í leikhópnum eru þrír krakkar sem fengu leiklistarkennslu við morgunverðarborðið heima hjá sér.

Börn þriggja þjóðþekktra leikara fara með hlutverk í uppsetningu leikfélags Menntaskólans í Reykjavík á verki Andra Snæs Magnasonar, LoveStar. Börnin eru þau Guðmundur Felixson, sonur Felix Bergssonar, Steiney Skúladóttir sem er dóttir leikkonunnar Halldóru Geirharðsdóttur og Eygló Hilmarsdóttir, dóttir Hilmars Jónssonar og leikkonunnar Sóleyjar Elíasdóttur. Þetta er í fyrsta sinn sem LoveStar er sett á svið og er leikstjóri verksins Bergur Þór Ingólfsson sem spann handritið að verkinu jafn óðum ásamt leikhópnum sjálfum.

„Ég held að það megi alveg fullyrða að við séum öll með leikhúsbakteríuna í okkur. Ég sjálf elst upp í kringum leikhúsið og þekki það líf mjög vel og finnst það mjög skemmtilegt,“ segir Steiney.

Þetta er í þriðja sinn sem hún stígur á svið með Herranótt auk þess sem hún hefur leikið í auglýsingum og öðru slíku. Guðmundur og Eygló hafa einnig reynslu af því að leika á sviði því þau hafa bæði staðið á sviði Þjóðleikhússins. Auk þess að fara með hlutverk í LoveStar sitja Steiney, Guðmundur og Eygló öll í stjórn Herranætur.

Steiney segist spennt fyrir frumsýningunni í kvöld og segir æfingarferlið allt hafa gengið mjög vel fyrir sig. „Ætli stressið geri ekki vart við sig seinni partinn í dag. Það kemur alltaf smá fiðringur í mann þegar maður stígur á sviðið en svo ferð það um leið og maður byrjar að leika. Mér finnst mjög gaman að standa á sviðinu, enda pínu athyglissjúk. Ég held að maður verði að búa yfir smá athyglissýki ef maður ætlar að verða leikari,“ segir hún og hlær.

LoveStar verður frumsýnt í Norðurpólnum klukkan 20.00 í kvöld. Miðapantanir fara fram í gegnum síma 695-4300.

sara@frettabladid.is