Fékk ráð hjá Downey Jr.

Gwyneth Paltrow deyr ekki ráðalaus ef hana vantar ráð. Hún upplýsti í kanadísku útgáfunni af Hello! að hún hefði þegið góð ráð hjá Robert Downey Jr. hvað varðar ávanabindandi vímuefni. Eins og flestum ætti að vera kunnugt kom Downey sér reglulega í klandur út af slíkum málum á sínum yngri árum.

Paltrow leitaði til Downey fyrir hlutverk sitt í kvikmyndinni Country Strong en þar leikur hún einmitt kántrístjörnu sem á í erfiðleikum með vímuefnin. Leikkonan vildi helst vita hvernig Downey hefði getað gert sig að fífli á einhverjum bar, niðurlægt ástvin og vaknað daginn eftir og látið eins og ekkert hefði í skorist. „Ég skildi þetta bara ekki," segir Paltrow.