Milljónir hlusta á söng stúlknanna í The Charlies

Stúlkurnar í hljómsveitinni The Charlies, þær Alma Guðmundsdóttir, Steinunn Camilla Sigurðardóttir og Klara Elíasdóttir, halda áfram að vekja verðskuldaða athygli í Borg Englanna. Nýverið bauðst þeim að syngja kynningarlag hins vinsæla sjónvarpsþáttar Dancing With The Stars, en þátturinn er með svipað áhorf og American Idol í Bandaríkjunum.

Lagið sem stúlkurnar syngja er endurgerð af klassíkinni Eye of the Tiger með hljómsveitinni Survivor en texta og nafni lagsins breytt í Figher on the Dancefloor og vísar þar með í danskeppnina sjálfa. Að sögn Ölmu fóru þær stöllur inn í hljóðver á fimmtudegi og var auglýsingin með laginu farin í loftið innan við viku síðar. Áætlað er að The Charlies komi svo fram í einum þættinum í vetur og syngi þá lagið fyrir áhorfendur. Alma segir þetta einstakt tækifæri fyrir hljómsveitina.

„Það að fá að syngja lag í auglýsingu í einum vinsælasta sjónvarsþætti í Bandaríkjunum er alveg frábært tækifæri fyrir okkur. Það er líka rosalega skrítið að hugsa til þess að milljónir manna séu að hlusta á lag sem við syngjum.“

Hún segir þær hafa heyrt lagið í fyrsta sinn í sjónvarpinu fyrir nokkrum dögum síðan og var það undarleg tilfinning. „Okkur finnst þetta kannski meira spennandi en fólki heima því maður veit hvað þessir þættir eru vinsælir og hvað það er mikil eftirvænting eftir nýju þáttaröðinni,“ segir hún og hlær.

Aðspurð segir Alma annars nóg að gera hjá stúlkunum og eyða þær miklum tíma í æfingar og fundarhöld með yfirmönnum plötufyrirtækisins. „Það er hellingur í gangi og ótrúlegustu hlutir að koma upp, þannig við erum í voða góðum gír,“ segir hún að lokum kampakát. -sm