Hrifin af húmor hvors annars

Upp mín sál! er uppistandshópur á vegum Listhópa Hins hússins sem mun skemmta bæði borgarstarfsmönnum og gangandi vegfarendum í sumar.

Hópurinn hyggst prófa sig áfram með annars konar grín og má þar nefna söng og lifandi sketsa. Í hópnum eru þau Gunnar Jónsson, nemandi í ritlist við Háskóla Íslands, Saga Garðarsdóttir, leiklistarnema við Listaháskóla Íslands, Ugla Egilsdóttir, nemi í fræði og framkvæmd við LHÍ og Þórdís Nadia Óskarsdóttir, kvikmyndafræðinemi við HÍ.

„Við Ugla kynntumst Gunnari á múslimaráðstefnu í Þýskalandi og fannst hann afskaplega fyndinn. Við erum öll mjög hrifin af húmor hvers annars og ákváðum því að sækja um skapandi sumarstarf Hins hússins og vera með grín og glens í allt sumar," segir Saga Óskarsdóttir sem hefur séð um vinsælt kvennauppistand á Næsta bar í vetur ásamt Nadíu og Uglu.

Að sögn Sögu fer mikill tími í undirbúning hjá hópnum en tekur fram að sá tími sé afskaplega skemmtilegur enda mikið hlegið. „Við sitjum bara og grínumst og eyðum miklum tíma í að sigta einkahúmorinn úr svo allir geti hlegið með okkur. Við erum oftast búin að ákveða um hvað við ætlum að fjalla hverju sinni þó við spinnum líka mikið í kring um það. Við Ugla höfum einnig verið að gera gamanlög og ætlum að reyna að þróa það svolítið meira í sumar auk þess sem við verðum með sketsa á Facebook."

Saga segir hópinn ekki feiminn enda ríki sannur listandi innan hans og telja þau óhugsandi að fólk deili ekki skopskyni þeirra. „Það gæti aldrei gerst að fólk hlægi ekki að okkur. Og ef það gerðist væri það bara fyndið, við gætum hlegið að því eftir á og jafnvel notað það sem efnivið í næsta uppistand," segir hún að lokum kampakát.

Hægt er að panta hópinn til að fara með uppistand á vinnustöðum með því að senda fyrirspurn á vefpóstinn ragnar.isleifur@gmail.com.