Sundáhugamaður ósáttur við kalt gufubað

„Hún er ekki nógu heit. Þetta er bara lítill kofi og það ætti ekki að vera erfitt að halda hitanum réttum. Í Breiðholtinu er hitinn svo mikill að mannni nánast bara skotið út,“ segir Eiríkur Jónsson, landsþekktur sundáhugamaður og ritstjóri Séð og Heyrt.

Eiríkur er ekki par sáttur með hitastig gufubaðsins í Sundhöll Reykjavíkur. Hann segist hafa farið í nánast allar sundlaugar á Íslandi, fyrir utan þá á Kjalarnesi, en hann hafi aldrei komið inní svona kalda gufu. „Það þarf að skrúfa upp hitann, þetta er bara eins og að vera í veislu heima með kertaljós á öllum borðum, það er allavega ekki hægt að vera nakin þarna inni,“ segir Eiríkur.

Katrín Irvin, rekstrastjóri Sundhallarinnar, kveðst kannast við þessa óánægju Eiríks þar sem hann hefði skrifað stutta færslu um málið á bloggi sínu fyrir nokkru. Hún segir gufuna vera í mjög góðu standi og vísar öllum kuldapælingum ritstjórans á bug. „Hún heldur sig yfirleitt í fjörutíu og fimm gráðum, það er svolítið fyrirtæki að breyta stillingunni. Um leið og ég sá færslu Eiríks fór ég og athugaði málið og gufan er bara eins og góðar gufur eiga að vera,“ segir Katrín en bætir því við að hún geti kólnað fljótt ef gestir halda hurðinni of lengi opinni. „En hún á að ná sér fljótt á strik aftur,“ segir Katrín. -fg