Sandra fékk bestu og verstu verðlaunin í gær

Sandra Bullock átti viðburðarríkan dag í gær því hún var valin besta leikkonan á Óskarsverðlaunahátíðinni fyrir leik sinn í myndinni The Blind Side. Það voru þó ekki einu verðlaun Söndru í gær því nokkrum klukkutímum áður en hún fékk verðlaunin eftirsóttu fékk hún önnur, minna eftirsótt.

Razzies verðlaunin eru veitt til þeirra sem þykja hafa staðið sig allra verst á árinu og hreppti Bullock „hnossið" fyrir frammistöðu sína í gamanmyndinni All About Steve. Hún tók hinum vafasama heiðri þó vel og mætti meira að segja á verðlaunaafhendinguna sem er nokkuð sjaldgæft að stjörnurnar geri. Sandra tók verðlaununum vel og sakaði dómnefndina í gríni um að hafa ekki horft á myndina og dreifði hún DVD diskum á hátíðnni til þess að reyna að rétta hlut sinn.

Þetta mun vera í fyrsta sinn sem sami leikari fær Óskarsverðlaun og Razzies verðlaun á sama árinu.