Gaga svaf á bílastæði - sendi staffið upp á hótel

Söngkonan Lady Gaga ferðast nú um Bretland og berast því fjöldi frétta af barferðum og undarlegri hegðun hennar þaðan. Á laugardagsnótt keyrði föruneyti hennar til að mynda til London eftir vel heppnaða tónleika í Birmingham.

Þar átti föruneytið pantaðar lúxussvítur á Dorchester hótelinu. Þegar búið var að ferja töskurnar úr rútunni og upp á herbergi neitaði Gaga aftur á móti að fara úr rútunni. Hún heimtaði að vera í henni um nóttina þannig að bílstjórinn neyddist til að leggja rútunni fyrir utan stórverslun og læsa á eftir sér.

„Þetta var mjög skrýtið," sagði einn hótelstarfsmanna. „Þau ferjuðu allar fínu töskurnar hennar, svona 20 talsins, upp á herbergi. Klukkan var þrjú um nótt. 15 mínútum seinna fór ökumaðurinn og einn öryggisvörður aftur upp í rútuna og þau keyrðu burt. Þau lögðu við hliðina á rútunni hennar Aliciu Keyes, sem var á hótelinu sömu nótt."

Sjö tímum seinna renndi flottur Mercedes upp að rútunni og inn fóru þjónar með morgunverð. Gaga fór síðan í hljóðver og eyddi deginum þar.