Á að vera gaman í bíó

Bragi Þór Hinriksson er sannkallaður kvikmynda-njörður. Þegar hann var níu ára sá hann Indiana Jones á Akureyri og eftir það varð ekki aftur snúið. Hann frumsýnir í dag fyrstu íslensku þrívíddarkvikmyndina, Algjör Sveppi og dularfulla hótelherbergið.

„Það er óðs manns æði að gera íslenska þrívíddarmynd. Ég myndi ekki mæla með því fyrir nokkurn mann. Þetta er vesen en alveg ótrúlega gaman,“ segir Bragi Þór Hinriksson kvikmyndaleikstjóri. Í dag mun eiga sér stað sögulegur viðburður þegar fyrsta íslenska þrívíddarkvikmyndin verður frumsýnd, Algjör Sveppi og dularfulla hótelherbergið. Þrívíddartæknin hefur tröllriðið bandarískum kvikmyndaiðnaði eftir að Avatar James Cameron feykti öllum miðasölumetum um koll og nú er komið að Íslandi.

Bragi segir þetta vissulega vera dýrt en þeir félagar fjárfestu í þrívíddarbúnaði fyrir sex milljónir. „Við ákváðum bara að láta slag standa eftir að hafa kannað málið. Þetta er auðvitað engin Avatar-þrívídd en engu að síður mjög fín.“ Bragi segir ekki ákveðið hvað verði um þennan búnað, hann vonast til að hann verði nýttur fyrir íslenska kvikmyndagerð enda áhugaverður kostur fyrir auglýsinga- og stuttmyndagerð. Leikstjórinn viðurkennir að Avatar-æðið hafi kveikt í honum. „Það kom síðan Breti á vegum Nýherja og hélt námskeið um þrívídd. Ég fór á það, fékk aðeins að þreifa á þessu og hringdi síðan í Sverri Þór og sagði honum að þetta væri eitthvað sem við gætum auðveldlega gert.“ Og þar með fór boltinn að rúlla. Félagarnir fjárfestu í græjunum og æfðu sig síðan í heilan mánuð. „Við vorum alveg tilbúnir þegar að stóra tökudeginum kom.“

Eins og flestir hafa eflaust tekið eftir eru fjölmargar tilvísanir í þekktar kvikmyndir í Algjörum Sveppa-myndunum tveim. Og Bragi fer ekkert í felur með að hann sé algjör kvikmyndanjörður. „Ég hef alltaf haft áhuga á kvikmyndum, alveg frá því að ég sá Indiana Jones, níu ára gamall. Það bara gerðist eitthvað þá. Mér hefur alltaf fundist að fólk eigi að hafa gaman í bíó.“ freyrgigja@frettabladid.is