Gervifótur Heather tekinn í sprengjuleit

Heather Mills, fyrrverandi eiginkona Sir Pauls McCartney, þurfti að sætta sig við að gervifótur hennar var settur í sprengjuleitartækið á Heathrow-flugvelli um helgina. Málmleitartæki gaf frá sér hljóð þegar Heather fór í gegnum leitarhliðið og var það rakið til gervifótarins. Þurfti hún því að bretta upp buxnaskálmina á meðan fóturinn var skoðaður og gegnumlýstur. Engin sprengja fannst.

„Heather var brjáluð en sagði ekkert. Hún virtist niðurlægð að þurfa að þola þetta fyrir framan aðra farþega,“ sagði einn viðstaddra við Daily Mirror. Talsmaður Heather tók það fram að aldrei hafi verið hætta á að hún þyrfti að taka af sér gervifótinn til skoðunar.