Lifir á kjúklingabringum í undirbúningi fyrir Playboy

Ásdís Rán hyggst fækka fötum fyrir karlatímaritið Playboy á næstu dögum. Útkoman er væntanleg í lok júlí, en myndirnar af Ásdísi verða alls 20.

„Mér finnst ekkert mál að láta mynda mig á baðfötum, en nakin er annað mál! Ég kvíði mikið fyrir þessu, en það er úrvalsfólk sem sér um myndatökuna sem á eflaust eftir að gera allt til að láta mér líða vel í tökunum,“ segir athafnakonan og fyrirsætan Ásdís Rán.

Ásdís ætlar að sitja nakin fyrir í búlgarska Playboy sem kemur út í lok júlí. Myndaþátturinn þekur 12 síður í blaðinu og myndirnar verða 20 talsins. Ásdís segir það svolítið skelfilega tilhugsun, en hún hafði lengi íhugað að taka tilboði um að sitja fyrir í blaðinu. „Ég ákvað að láta til skarar skríða núna og er mjög ánægð með þessa ákvörðun,“ segir Ásdís. „Ég stefni á að sýna líkama minn stolt sem þriggja barna móðir á fallegan hátt.“

Hversu mikið færðu borgað?

„Ég get ekki gefið upp launin, þau eru trúnaðarmál. En ég er mjög sátt við þennan samning og þetta er án efa best launaða verkefni mitt hingað til. Ég er bara þakklát fyrir að geta unnið mér inn þessi laun fyrir eins dags vinnu.“

Ásdís er gift fótboltamanninum Garðari Gunnlaugssyni. Hann átti stóran þátt í ákvörðun hennar.

„Það var í rauninni Garðar sem hafði valdið til að taka lokaákvörðunina. Hann hvatti mig til þess ásamt öðrum fjölskyldumeðlimum,“ segir Ásdís. „Ég fæ stuttan undirbúningstíma, en takan er eftir tíu daga í Grikklandi svo að núna er ég bara í ræktinni og lifi á kjúklingabringum – svona aðeins til að móta mig til fyrir stóra daginn.“

atlifannar@frettabladid.is