Fálkamynd sýnd á hátíð í Suður Kóreu

„Ég fer út og vera viðstaddur fjórar sýningar en þetta er í fyrsta sinn sem ég kem til Suður Kóreu og því mjög spenntur,“ segir Örn Marinó Arnarson kvikmyndargerðamaður. Mynd Arnar Marinós og Þorkells Harðarsonar, Feathered Cocaine hefur verið valin til sýninga á stórri kvikmyndahátíð í Seoul í Suður Kóreu. Hátíðin ber nafnið EIDF og var Feathered Cocaine valin úr hópi 536 kvikmynda til sýninga á hátíðinni.

„Við sóttum í rauninni ekkert eftir að komast á hátíðina heldur höfðu aðstandendur hátíðarinnar samband við okkur,“ segir Örn Marinó en myndinni hefur átt góðu gengi að fagna út í hinum stóra heima og vakið meiri athygli en þeim félögunum hefði nokkurn tíma grunað. Hún var meðal annars sýnd á Tribecahátíðinni í New York og var hún sýnd fimm sinnum þar fyrir fullu húsi.

Myndin er heimildamynd sem fjallar fálkasmygl og afleiðingar þess. Myndin tók hins vegar óvænta stefnu þegar aðalsöguhetja myndarinnar Alan Parrot fullyrti að Osama Bin Laden byggi í Íran undir verndarvæng þarlendra stjórnvalda og væri mikil áhugamaður um fálka, það kemur fram í myndinni að fálkasala er ein helsta tekjulind Al Qaída samtakanna. Eins og Fréttablaðið hefur áður greint frá hafa þessar upplýsingar vakið mikil viðbrögð hjá bandarískum fjölmiðlum.

Landsmenn geta borið myndina augum í haust þegar hún verður frumsýnd í íslenskum bíóhúsum. „Við hlökkum mikið til að sýna myndina hér á landi enda er þá löngu og ströngu ferli lokið,“ segir Örn Marinó en alls tók vinnuferlið í kringum myndina sex ár. - áp