Unglingar í Hagaskóla halda góðgerðardag

Þann 24. mars, miðvikudaginn, næstkomandi verður haldinn góðgerðardagur í Hagaskóla. Húsið er opið fyrir almenning frá klukkan 16:00 til 19:00. Markmiðið er að safna peningum fyrir tvenn góðgerðarsamtök.

Síðustu vikur hafa krakkarnir í skólanum unnið hörðum höndum að undirbúningi dagsins. Meðal þeirra hluta sem verður í boði má nefna fjölbreytt tónlistar-og dansatriði, flóamarkaður, andlitsmálning fyrir börnin, naglasnyrting, litun og plokkun, rjómakökukast, körfuboltakeppni og margt fleira spennandi í boði gegn vægri greiðslu. Einnig verða þrjú kaffihús víðs vegar um skólann þar sem gestir og gangandi geta keypt sér kaffi og annað góðgæti.

Allur ágóði af deginum rennur til tveggja góðgerðasamtaka, Sóleyjar og félaga og Vildarbarna. Sóley og félagar eru grasrótarsamtök sem eru að byggja munaðarleysingjahæli og skóla fyrir börn og unglinga í Tógó. Vildarbörn er ferðasjóður fyrir langveik börn og börn sem búa við sérstakar aðstæður.