Mikil sorg og áfall fyrir samfélagið

„Það var haldin bænastund í Fjölbrautaskólanum á Suðurnesjum í morgun," segir Sigurður Grétar Sigurðsson, prestur í Útskálakirkju í Garði, en önnur stúlkan sem lést sótti þar nám auk stúlkunnar sem liggur nú þungt haldin á gjörgæslu eftir bílslysið í Reykjanesbæ.

Tvær stúlkur eru látnar eftir slysið sem átti sér stað á hringtorgi í Keflavík snemma á laugardagsmorgninum. Jeppabifreið sem piltur ók valt með þeim afleiðingum að tvær af stúlkunum eru látnar og ein liggur þungt haldin á spítala. Pilturinn slapp með minniháttar meiðsl.

„Það er mikil sorg og þetta er mikið áfall fyrir samfélagið eins og alltaf þegar ungt fólk fer með þessum hætti. Það eru allir mjög slegnir," segir séra Sigurður en bænastundir voru haldnar í Útskálakirkju um helgina.

„Þarna kom fólk saman og ég fór yfir stöðuna eins og hún var þá. Við töluðum saman og tókum utan um hvort annað," segir séra Sigurður en aðstandendur eru slegnir vegna atburðanna.

Séra Sigurður segir að það verði svo haldin kyrrðarstund í Útskálakirkju á miðvikudagskvöldið næsta. Þá verður þjónustan helguð þeim sem lentu í slysinu.

„Það eru margir í miklu sjokki," segir séra Sigurður um líðan aðstandenda.

Eins og fyrr segir þá liggur þriðja stúlkan enn þungt haldin á gjörgæslu. Pilturinn var útskrifaður skömmu eftir slysið. Lögreglan hefur málið til rannsóknar.

Ekki er unnt að greina frá nöfnum þeirra sem létust að svo stöddu.