Sunnudagaskólinn kemur út á mynddiski fyrir jólin

„Ég er rosalega stoltur af þessu verkefni,“ segir Guðni Már Harðarson, prestur í Lindakirkju.

Undanfarna mánuði hafa Guðni Már og Guðmundur Karl Brynjarsson, prestar í Lindakirkju ásamt Þorleifi Einarssyni, leiklistarnema og sunnudagaskólakennara auk fleiri reyndra sunnudagaskólakennara þjóðkirkjunnar, unnið við handritaskrif að sunnudagaskólaefni fyrir börn. Afraksturinn kemur út á DVD-mynddiski í nóvember. Í aðalhlutverkum eru þau Hafdís og Klemmi sem lenda í ýmsum skemmtilegum ævintýrum áður en þau fara í sunnudagaskólann. Leikarinn Jóel Sæmundsson og Hafdís Matsdóttir, sunnudagaskólakennari í Lindakirkju, fara með hlutverk þeirra.

„Þetta er mjög stórt verkefni. Það hafa um eitt hundrað manns komið að þessu og við erum búin að vera að taka þetta upp í allt sumar,“ segir Guðni Már. „Við erum búin að leggja mikla vinnu í þetta.“ Diskurinn inniheldur rúmlega hundrað mínútur af efni í fjórum þáttum, tuttugu sunnudagaskólalög í hressilegum búningi, brúður og gamanmál, auk bæna, biblíuversa og fjögurra af þekktustu dæmisögum Krists.

Við handritaskrifin var þeirri meginreglu fylgt að hafa efnið grípandi með stuttum og snöggum myndskeiðum eins og barnaefni nútímans er framleitt. Í hverjum þætti er sýndur brúðuþáttur í prúðuleikarastíl sem Þorleifur Einarsson hannaði en brúðurnar koma jafnframt frá sér biblíusögu dagsins á skemmtilegan hátt með fallegum myndum.

Með útgáfunni vilja prestarnir koma betur til móts við þann stóra hóp foreldra sem vill kenna börnunum sínum kristin gildi með nútíma aðferðum. „Þetta er gert bæði af þörf og svo man ég að biskup hvatti til þess fyrir einu og hálfu ári í ræðu sinni að kirkjan yrði að fara að gefa út líka á DVD, ekki bara koma boðskap til barnanna í gegnum sunnudagaskólann,“ segir Guðni Már, spenntur fyrir útgáfunni.freyr@frettabladid.is